Танымал дизайнер Құралай Нұрқаділова әкесі, белгілі мемлекет және қоғам қайраткері Заманбек Нұрқаділовпен арадағы соңғы кездесуі туралы естелігімен бөлісті деп жазады Democrat.kz.
Оның айтуынша, он бес жылдық үзілістен кейін әкесімен соңғы рет оның өмірден өтерінен үш ай бұрын кездескен.
Сол жолы Заманбек Нұрқаділов қызына арнайы келіп, әкелік батасын берген. Кездесу барысындағы әңгімеде ол өмірін халыққа арнағанын, ар-ожданы таза екенін айтып, қызына үнемі басын тік ұстап жүруді аманаттаған.
Әкесі қызына материалдық тұрғыдан көп нәрсе бере алмаса да, ең бастысы тәрбие мен намыс дарытқанын, оның бәріне өз еңбегімен жеткенін мақтан тұтатынын жеткізген.
Сондай-ақ Парижге барғанда адамдарға қызының сән көрсетілімін өткізгенін мақтанышпен айтатынын және болашақта Заманбек Нұрқаділовті жақсы көрген кез келген қазақтың шаңырағы қызына үлкен құрмет-қошемет көрсететініне сенімді екенін білдірген.
Құралай Нұрқаділова әкесінің дәл осындай кең жүректі, асқақ тұлға болғанын ерекше тебіреніспен еске алады.
