Танымал журналист, қоғам белсендісі Ләззат Асанова Оқу ағарту министрі Жұлдыз Сүлейменоваға әлеуметтік желідегі парақшасы арқылы үндеу жасады деп жазады Democrat.kz.
Өз үндеуінде журналист қоғамды алаңдатқан мәселелерді айтып, министрдің назар аударуын сұрады.
"Құрметті Жұлдыз Досбергенқызы!
Мен, журналист Ләззат Асанова, қоғамды алаңдатқан мәселелерді жариялап, мемлекеттік органдардың ашықтығы мен заң үстемдігін қамтамасыз етуге үн қосып жүрген БАҚ өкілі ретінде Сізге осы ашық үндеуді жолдаймын.
Президент жариялаған «Әділетті Қазақстан», «Заң мен тәртіп» қағидаттары мен білім саласында насихатталатын академиялық адалдық ұстанымдары ең алдымен мектеп басшыларынан басталуы тиіс деп есептеймін.
Алайда Түркістан облысы, Шардара ауданындағы Сырдария жалпы білім беретін мектебіне қатысты қоғамда көптен бері талқыланып келе жатқан жағдайлар әлі күнге дейін көптеген сұрақтарға жауап бермей отыр. Қоғам арасында бұрын Шардара аудандық білім бөлімінде бухгалтер болып қызмет атқарған Баратова Баянға және мектеп директоры Гаухар Алекеноваға қатысты мемлекеттік қаражаттың директордың жеке банк шотына аударылуына байланысты құқықтық мәселе болғаны жөнінде мәліметтер айтылып келеді. Сондай-ақ бұл іске байланысты әртүрлі процессуалдық шешімдер қабылданғаны туралы ақпараттар да тараған. Егер осы ақпараттар шындыққа сәйкес болса, онда қоғам атынан мынадай сұрақтарды қою заңды деп санаймын:
Мемлекеттік қаражат жеке банк шотына қандай негізде аударылған?
Бұл оқиғаға құқық қорғау органдары мен уәкілетті органдар қандай құқықтық баға берді?
Осындай жағдайдан кейін мектеп басшысының қызметтік әдебі мен лауазымына сәйкестігіне министрлік тарапынан бағалау жүргізілді ме?
Балаларға адалдық пен әділдікті насихаттайтын білім ұйымының басшысы қоғам алдындағы сенім талаптарына толық сәйкес келе ме?
Бұл үндеу арқылы ешкімді соттың заңды күшіне енген шешімінсіз кінәлі деп жариялауды мақсат етпеймін. Алайда қоғамда туындаған күмән мен сұрақтарға мемлекеттік органдар ашық, нақты және заң аясында жауап беруге міндетті деп санаймын.
Білім беру жүйесіне деген сенім – мемлекетке деген сенімнің бір бөлігі. Сондықтан мұндай мәселелер жабық күйде қалмай, ашық қаралып, заң талаптарына сәйкес шешілуі тиіс.
Осыған байланысты Сізден аталған жағдайдың мән-жайын зерделеуді, қажет болған жағдайда қызметтік тексеру жүргізуді және оның нәтижесі туралы қоғамға ресми ақпарат беруді сұраймын.
Заң бәріне ортақ болғанда ғана Әділетті Қазақстанның қағидаты жүзеге асады. Ал адалдық – сөзбен емес, нақты әрекетпен дәлелденуге тиіс", - деп жазды Ләззат Асанова.
