"Сабақ мүлде өткізілмеген": Оқу ағарту министрі мәлімдеме жасады

20 ақпан 2026

2442

"Сабақ мүлде өткізілмеген": Оқу ағарту министрі мәлімдеме жасады

Фото интернеттен.

Қазақстанда жекеменшік мектептерге қойылатын талап мемлекеттік стандартпен толық теңестіріледі. Енді қойма мен моншадан мектеп ашып, бюджеттен қаржы алып отырған кәсіпкерлер қатаң бақыланатын болады деп хабарлайды Democrat.kz. сайты Ertenmedia.kz.-ке сілтеме жасап.

Еліміздің Оқу-ағарту министрі Жұлдыз Сүлейменова осыған орай мәлімдеме жасап, жекеменшік білім саласындағы жаңа талап туралы нақты ұстанымын айтты.

«Министрлік жекеменшік мектептердің жұмысын мемлекеттік мектептегідей қатаң стандартқа келтіруді көздеп отыр. Енді білім беру мекемелерінің жұмысы толық цифрланады. Бұл әр мектептің жұмысы мемлекет үшін ашық әрі заң талаптарына сәйкес болуын қамтамасыз етеді», – деді министр.

Сондай-ақ, ол жекеменшік мектептерді тексеру барысында анықталған бірқатар өрескел заңбұзушылықтар туралы ашық айтты.

«Кейбір кәсіпкерлер білім ордасын мектепке мүлдем лайық емес жерлерде бұрынғы қоймаларда, моншаларда ашқан! Тіпті кейбірінде балалар қағаз жүзінде тіркелгенімен, сабақ мүлдем өткізілмеген. Оқу бағдарламасы толық сақталмай, алғашқы әскери дайындық, дене шынықтыру сияқты міндетті пәндер жүргізілмеген. Мұндай «мектептердің» ғимараты да мақсатқа мүлдем сәйкес келмейді», – деп қадап айтты министр.

Министрлік осы талаптарды бұзған мектептерді мемлекеттік қаржыландырудан шеттетеді. Мемлекеттік қолдау тек толық жабдықталған ғимараты, білікті педагогтары бар және мемлекеттік оқу бағдарламасының барлық талаптарын бұлжытпай орындап отырған мектептерге ғана беріледі.