Қоғам белсендісі, белгілі журналист Ораз Әлімбеков Бас мүфти Наурызбай Өтпеновтің қазіргі кезде АҚШ-та қалай, кімнің ақшасымен қыдырып жүргенін айтты деп жазады Democrat.kz.
"Конституциялық кеңесте ел болашағын ойлаған қайраткерлер «Дінді мемлекеттен бөлу қажет және оны Конституцияда шегелеп жазу керек» деп ұсыныс айтып жатқан тұста қатардағы көп ұйымның бірі ҚМДБ төрағасы Наурызбай Өтпенов қасына екі уағызшысын ертіп АҚШ-қа кетті.
Олар АҚШ-тың 5 ірі қаласындағы қазақ диаспорасымен, студенттермен «рухани кездесу» өткізеді екен.
«Садақаны мешітке апарып бер – сауабы мол» деп уағыздайтын сұраншақ молдалардың АҚШ-қа сапарын ҚР Сыртқы істер министрлігі (СІМ) ұйымдастырыпты.
Бұл сапар жөнінде «Америка Құрама Штаттарындағы Қазақстан Республикасының Елшілігінің ұйытқы болуымен...» деп жазды «мүфтият.кз».
Молдалардың жұрт қатарлы белі қайысып, ащы тері төгіліп жұмыс істемейтіні бесенеден белгілі. ҚМДБ - халықтан зекет, пітір-садақа жинап күнкөріс жасайды.
Мынау үшеудің АҚШ сапарының шығынын СІМ өтесе де, мүфтият есепшотындағы ақшамен қыдырып кетсе де, онсыз да әлеуметтік-экономикалық күйзеліске тап болған Қазақстан халқына ауыртпалық артты.
Әлдебір қоғамдық ұйымның 3 уағызшысы АҚШ-тағы қазақтарға қандай рухани әңгіме айтушы еді!?. Бас мүфти Наурызбай Өтпенов секілді «балиғат» жасқа келген қыздарың АҚШ-та хиджаб кисін» дей ме?!. Әлде, анау екі уағызшы секілді «Садақаны Алматыдағы «Нұр-Мүбаракқа» бергендерің абзалырақ, басқа садақадан сауабы мол» деп, өздері әрең күн көріп жүрген қазақ студенттері мен мигранттардың миын ашытпақ па?!.
Наурызбай Өтпенов Бас мүфти болғалы бері мүфтият молдалары әбден жетісіп асқақтады ғой, түге... Медреселері мен «Нұр-Мүбарагіне» Ғылым және Білім министрлігінен миллиардтап ақша бөлгізеді, заңға томпақ осы қылығын жасыру үшін Дін істері комитетін адвокатынша қорғатып қояды.
Туристік компанияларды «сенің Арабияға адам тасуға қақың бар, сенікі - жоқ» деп алалап, нарықтағы бәсекелестікті жойды.
ҚМДБ-ның Әділет министрлігінде тіркеген жарғысын бұзған - осы молда - Наурызбай Өтпенов. Енді нөкерлерін ертіп алып АҚШ-ты адақтап, рахаттанып қыдырып қайтатын бір апталық сапар шығынын СІМ-нің мойынына іліп қойыпты...
«Мың асқанға – бір тосқан» қашан болады? Әлде, ҚР Конституциясына «ҚМДБ – көптің бірі.., мемлекеттен мүфтиятқа бір тиын берілмейді, молдалардың мешіт ішінде ғана уағыз айтуға қақысы бар» деп тайға таңба басқандай жазып қою керек пе?!."дейді Ораз Әлімбеков.
