Тойға түскен ақша декларацияда көрсетілуі керек

12 наурыз 2025

831

Тойға түскен ақша декларацияда көрсетілуі керек

Мемлекеттік кірістер комитетінің жеке тұлғалардың кірістерін әкімшілендіру басқармасының басшысы Дина Құсайынова BIZDIÑ ORTA подкасында тойда сыйлыққа алған ақшаны да декларацияда көрсету керегін және қандай жағдайда мобильді аударымдарды декларациялаудың қажеті жоғын айтты. Дина Құсайынова қазақстандықтардың тойдан сыйлыққа түскен ақшаны декларациядан көрсетуге міндетті екенін айтты. “Егер қаражатты сыйлаған адам декларацияда қаражаттың сыйлық екені көрсетіп, ақшаны алған адам декларацияда қаражаттың қайдан келгенін көрсетпесе сәйкессіздік болады. Сондықтан заңға сәйкес, олар ақшаны табыс ретінде көрсетіп, егер сыйлық тегін, қайтарымсыз негіззде берілсе, түзету жасау керек. Бұл жағдайда жеке табыс салығы есептелмейді. Бірақ декларацияда қомақты сомаларды көрсету қажет”, – дейді мемлекеттік кірістер комитетінің жеке тұлғалардың кірістерін әкімшілендіру басқармасының басшысы. Сондай-ақ ол қайтарымсыз сыйлық бар және қайырымдылық барын айтты. Оның сөзінше, қазір “қайырымдылықпен айналыстық” дейтін блогерлердің қарасы көп. Оның да өз заңы бар дейді ол.

“Қайырымдылықпен айналысатындардың қоры бар. Олар құзырлы органдарға есеп беруге міндетті. Есебі болса, салықты табыстан ала беруге болады деген сөз. Егер сіз қайырымдылықпен айналысатын блогер болсаңыз, есепте кімге көмектескеніңіз, қанша ақша жиналғаны көрсетілуі керек”, – дейді Дина Құсайынова.

“Отбасы мүшелерінің бір-біріне жасаған мобильді аударымдары декларацияда көрсетілмейді. Мобильді адарымдар адамдардың жеке қажеттілігіне арналған. Мен де үнемі ұлыма ақша жіберіп тұрамын. Мұны декларациялаудың қажеті жоқ. Өйткені бұл жеке табыс салығы салынатын табыс. Бұл менің ұлымның табысы болып есептелмейді. Себебі ал ақша жеке қажеттілікке жұмсалды. Егер маған 3 ай бойы 100 түрлі адамнан ақша аударылған жағдайда ғана мобильді аударымдарға назар аударылады. Бұл қандай да бір қызмет түрі көрсетіледі немесе бір тауар сатылып жатыр деген сөз. Қазақтарда 100 түрлі адамнан той жасағанда ғана ақша түсуі мүмкін. Онда да, бір айда ғана”, – дейді Дина Құсайынова. Фото көрнекілік үшін.