Үкіметтің кеңейтілген отырысы: Кадрлық ауыс-түйістер бола ма?

Ертең, яғни қаңтардың 28-і күні Президент Қасым-Жомарт Тоқаевтың төрағалығымен Үкіметтің кеңейтілген отырысы өтеді деп жазады Democrat.kz. Ертеңгі өтетін алқалы жиында қандай мәселелер көтеріліп, қандай жағымды жаңалықтар болуы мүмкін? Осы сұрақтарға қатысты еліміздің бірқатар сарапшылары мен саясаттанушы, экономистері өз пікірлерін білдірді. Мәселен, саясаттанушы Замир Қаражанов ертеңгі жиында айтарлықтай кадрлық ауыс-түйіс болмайды дейді.

“Меніңше,Үкіметтің кеңейтілген отырысында министрлер кабинетінің 2024 жылғы жұмысының қорытындысы шығарылады. Онда Қазақстанның дамуының негізгі көрсеткіштері айтылады деп болжануда. Бізді ең алдымен ЖІӨ өсу қарқыны қызықтырады. Халықаралық қаржы ұйымдарының алдын ала болжамдары бойынша, биыл Қазақстан экономикасының өсу қарқыны 5 пайыздан аз болады, бұл он жылда алғаш рет ЖІӨ өсімі асып кеткен былтырғы көрсеткіштен өзгеше, бес пайыздық шекара. Дегенмен, сұрақ ашық күйінде қалып отыр: 2024 жылы бұл көрсеткіш 5 пайыздан қаншалықты төмен болады?

Бұған дейін Президент ЖІӨ-нің 5 пайыздан жоғары өсуі Қазақстан экономикасын екі есеге арттырудың қажетті шарты болып табылатынын айтқан болатын. Күн тәртібін ескере отырып, әр министрлік өз жұмысы туралы есеп береді деп күтілуде. Сонымен қатар, Президент 2025 жылға арналған үкімет алдындағы негізгі міндеттерді белгілеуі мүмкін. Соңғы жылдары белгілі бір оң өзгерістерге қол жеткізілді. Өзекті мәселелердің ішінде мемлекеттің экономикаға қатысуының жоғары үлесі де ерекшеленеді. Оны қысқарту үшін жекешелендіру процестері және квазимемлекеттік сектор компанияларының IPO-сын өткізу басталды. Алайда, бұл процесс өте баяу жүреді. Сонымен қатар, ішкі нарықтағы бәсекелестік деңгейі төмен болып қала береді. Меніңше, ертеңгі жиында айтарлықтай кадрлық ауыс-түйіс болады деп күтудің керегі жоқ”, - деген саясаттанушы Президенттің осыған дейін де әкімдердің жұмысын сынға алғанын тілге тиек етті. Ал саясаттанушы-экономист Әнуар Бақытхановтың пікірінше ертеңгі жиында өткен жылдың қорытындысы мен алдағы уақытқа жасалатын жоспарлар сөз болуы мүмкін. “Бюджетке қысымның артуы және валюта нарығының тұрақсыздығы жағдайында Үкімет макроэкономикалық тұрақтылықты нығайту және бизнес пен азаматтардың сенімін арттыру шараларын енгізуі мүмкін. Алайда түбегейлі реформаларды немесе күрт өзгерістерді күтудің қажеті жоқ шығар. Десек те, қазіргі қиындықтарға біртіндеп бейімделуге баса назар аударылады деп ойлаймын. Кадрларды ауыстыруға келетін болсақ, министрлер кабинетінде үлкен өзгерістерді күту екіталай. Министрлердің қазіргі құрамы өте жас және президенттің ұзақ мерзімді стратегиясын ескере отырып құрылған болуы мүмкін, бұл қазіргі командаға деген сенімді білдіреді. Дегенмен, жекелеген министрліктердің тиімділігі сұрақтар туғызады. Бірқатар ауыстырулар болуы мүмкін, әсіресе экономика мен қаржыға жауапты негізгі ведомстволарда. Ел экономикасына аса басымдық беріледі деп ойлаймын. Сонымен қатар қазіргі теңгенің теңгеріміне қатысты да бірқатар тапсырмалар берілуі мүмкін деп күтемін”, - дейді Әнуар Бақытханов. Саясаттанушы Талғат Қалиев Президент таяуда басылымға берген сұхбатында ертеңгі болатын жиында қандай мәселелер сөз болатынын адын-ала хабарлағанын айтады. Сарапшының ойынша Үкіметтің кеңейтілген жиынында - экономикалық, саясат, инвестиция және күштік құрылымдағы мәселелерге басымдық беріледі. "Естеріңізде болса, Президент өткен жолғы сұхбатында шұғыл шешілуге тиіс мәселелер барын айтып өтті. Жиында ең басты мәселе ретінде ел экономикасы сөз болады деп ойлаймын. Сондай-ақ Мемлекет басшысы жағдайды тұрақты ұстауы үшін министрлерден нақты бір іс-шараларды жүзеге асыруды талап етуі мүмкін. Мұнан бөлек, ІІМ, Бас Прокуратура, Қарулы күштердің адресіне қатаң сындар айтылуы мүмкін”, - дейді саясаттанушы Талғат Қалиев. Фото көрнекілік үшін.