Қазақстанда әйелдерге арналған «Ұмай» ипотекасына өтінім қабылдау басталған күні-ақ уақытша тоқтатылды. Бағдарламаның алғашқы 9 млрд теңгелік траншы сағат 16:00-ге қарай толығымен игеріліп, банк келесі қаржыландыруды мерзімінен бұрын тарту мәселесін қарастыра бастады, деп жазады Democrat.kz.
31 тамызда Отбасы банк әйелдерге арналған «Ұмай» ипотекалық бағдарламасына өтінім қабылдауды бастады.
Алайда сұраныс күткеннен әлдеқайда жоғары болды. Банк мәліметінше, сағат 16:00-ге қарай алғашқы транштың лимиті толығымен таусылған.
Алғашқы кезеңге Азия даму банкінен 9 млрд теңге бөлінген.
Бағдарлама бойынша ең жоғары заем мөлшері 50 млн теңгені құрайды. Алматы мен Астанада бастапқы жарна кемінде 20 пайыз, басқа өңірлерде 15 пайыздан басталады.
Несие мөлшерлемесі бастапқы кезеңде жылдық 14,8 пайызды құрайды. Депозитте тұрғын үй құнының 50 пайызы жиналғаннан кейін тұрғын үй заемына ауысып, мөлшерлемені 5 пайызға дейін төмендетуге мүмкіндік бар.
Бағдарламаға ресми табысы және соңғы алты айдағы зейнетақы аударымдары бар әйелдер қатыса алады. Отбасының орташа таза айлық табысы 1,25 млн теңгеден аспауы тиіс.
Банк енді Азия даму банкінен келесі траншты жоспарланған мерзімнен бұрын алу мүмкіндігін қарастырып жатыр. Жаңа өтінімдер қашан қабылданатыны кейін хабарланады.
