Таяуда шымкенттік танымал журналист Арай Есенбек ауыр баптармен айыпталып, қамауға алынған еді. Осы оқиғаға қатысты Шымкентте басқа да қылмыстар мен былықтар ашылып жатқанын айтқан заңгер Айгүл Орынбек мәселеге Ақорданың араласуын талап етті деп жазады Democrat.kz.
Заңгер Айгүл Орынбек өзінің әлеуметтік желідегі парақшасында: "Арай Есенбектің қылмысын ашамыз деп, Шымкент қаласы “Аманат” партиясы депутатының былығы да қоса ашылып жатыр.
Шымкент қаласының әкімдігі Арайды әшкерелейміз деген сайын, өздері “бонус контент” болып кететін жаңа қылмыстарды ашып беріп жатыр.
Сонымен, Аманаттық депутат қандай қызға “куни” жасаған екен?
Ақыры қылмысын аштыңдар ма, бәрін ашық көрсетіңдер!
Маған Арай Есенбектің қылмысы аса қызық емес. Қызығы — әкімдіктің өзін ақтау үшін қай деңгейге дейін баратыны.
Қазір Шымкент қаласы әкімдігі Арайдың кінәсін дәлелдейміз деп бар ресурсты қосқан сияқты. Бірақ сол “ресурс” жол-жөнекей біраз шенеунік пен депутаттың да құпиясын бірге сүйреп шығып жатыр. Арайдың тергеуде тәркіленген телефонынан шыққан мәліметтерге қарасақ, енді мемлекеттік басқаруды емес, WhatsApp-тағы “архивтерді” талқылайтын күн алыс емес сияқты.Ақорда сіздердің араласатын уақыттарыңыз келді!
Әйтпесе мына жақтағы дау саясиланып барады!
Арайға ақша берген мемлекеттік қызметкерлерге де қылмыстық іс ашылуы керек.
Чектері дайын тұр — демек, дәлел бар. Арыз жазатын адам іздеп әуре болудың да қажеті жоқ.
Ал ең бастысы — тергеу кезінде алынған телефондағы жеке хат-хабарларды үшінші тұлғаларға таратқан тергеуші міндетті түрде жазалануы тиіс. Әйтпесе, бұл ертең кез келген адамның басына келетін қауіпті прецедент болады",деп жазды.
