Астанада сүйіктісінің өліміне және оның ақшасын иемденуге байланысты айыпталған 2002 жылы туған Владислав А.-ға үкім шықты. Сот оны 10 жылға бас бостандығынан айырды, деп жазады Democrat.kz.
Іс материалдарына сәйкес, оқиға 2026 жылғы 4 ақпанда болған. Тергеу нұсқасы бойынша, кешкі уақытта Владислав сүйіктісі Яна тұратын пәтерде оның тыныс алу жолдарын қолымен жауып, салдарынан қыз механикалық асфиксиядан көз жұмған.
Осыдан кейін жігіт марқұмның iPhone 13 телефонын алып, құпиясөзін білгендіктен банк қосымшасына кірген. Кейін оның шотындағы 204 мың теңгені басқа есепшотқа аударып, пәтерден кеткен.
Сот барысында Владислав адам өлтіруге қасақана ниеті болмағанын мәлімдеген.
Оның айтуынша, Янамен осы жылдың қаңтарында интернет арқылы танысқан. Кейін екеуі кездесіп, жақын қарым-қатынаста болған. Сотталушы интимдік қатынас кезінде тұншықтыру әрекетін бұрын да өзара келісіммен қолданғандарын айтқан.
Оқиға болған күні де екеуі бірнеше кафе мен барда алкоголь ішкеннен кейін Яна тұрған пәтерге барған.
Владиславтың сөзінше, жақын қарым-қатынас кезінде ол қызды бұрынғыдай тұншықтыра бастаған. Біраз уақыттан кейін Яна қимылсыз қалған. Жігіт оны есін жиғызуға әрекет жасағанымен, нәтиже болмағанын айтқан.
Сотталушы осыдан кейін абдырап, Таразға кетуге шешім қабылдағанын жеткізді. Ол марқұмның телефонын өзімен бірге алып, банк шотындағы ақшаны досының есепшотына аударған.
Кейін таксимен барға барып, түнгі уақытқа дейін сонда болған. Келесі күні Таразға бағыт алған кезде полиция қызметкерлері оны жолдан ұстаған.
Владислав адам өлімі абайсызда болғанын айтып, адам өлтіру ниетін жоққа шығарды. Ал марқұмның ақшасын алғанын толық мойындап, оны басқа қалаға кетуге жұмсамақ болғанын айтқан.
Марқұмның әпкесі сотқа азаматтық талап арыз түсірген. Сот бұл талапты қанағаттандырып, сотталушыдан 6 миллион теңге өндіру туралы шешім шығарды.
Сот үкімі бойынша Владислав А. 10 жылға бас бостандығынан айырылды.
Үкім әзірге заңды күшіне енген жоқ.
