ҚазҰУ базасындағы ресейлік МИФИ Ұлттық зерттеу ядролық университетінің Алматы филиалы алғашқы түлектерін шығарды. Олар ядролық физика, технология және есептеу техникасы бойынша білім алған деп жазады Democrat.kz.
Алматыда МИФИ Ұлттық зерттеу ядролық университеті филиалының алғашқы түлектеріне диплом табысталды. Жас мамандар «Ядролық физика және технологиялар» және «Информатика және есептеуіш техника» бағдарламаларын аяқтаған.
Филиал 2022 жылы ҚазҰУ базасында ашылған. Қазір онда 140-тан астам студент білім алады, оқу процесіне Қазақстан мен Ресейдің оқытушылары тартылған.
Бұл оқиға Қазақстанда атом электр станциясын салу және ядролық энергетиканы дамыту мәселесі талқыланып жатқан кезеңде ерекше мәнге ие. Ядролық салаға тек реактор физигі емес, радиациялық қауіпсіздік маманы, материалтанушы, инженер, бағдарламашы және апаттық жүйелерді басқаратын қызметкер қажет.
Алайда алғашқы түлектердің диплом алуы елдегі барлық кадр мәселесі шешілді дегенді білдірмейді. Олардың саны, нақты жұмыс орны, өндірістік тәжірибесінің деңгейі және Қазақстандағы атом жобаларына қаншасының тартылатыны әзірге жарияланған жоқ.
Ресейлік университет филиалының жұмысы академиялық ынтымақтастықпен қатар технологиялық тәуелділік мәселесін де көтереді. Қазақстан ядролық мамандарды бірнеше елдің университеттерімен бірлесіп даярлап, қауіпсіздік пен ғылыми сараптамада балама мектептер қалыптастырғаны жөн.
