Бұрынғы депутат Азат Перуашев пен «Ақ жол» партиясының интернет ресурстарына жасалған кибершабуылға байланысты полиция сотқа дейінгі тергеуді бастады. ІІМ күдіктілерді анықтау жұмысы жүріп жатқанын хабарлады, деп жазады Democrat.kz.
Азат Перуашев бұған дейін өзіне және партияның әлеуметтік желідегі ресурстарына жаппай ақпараттық шабуыл жасалғанын мәлімдеген.
30 қыркүйекте ІІМ басшысының міндетін атқарушы Санжар Әділов бұл фактіге қатысты қылмыстық іс қозғалғанын растады.
Сотқа дейінгі тергеу 28 қыркүйекте тіркелген.
Полиция көрінеу жалған ақпарат тарату фактілерін де тексеріп жатыр. Тергеуге ІІМ-нің киберқылмысқа қарсы департаменті тартылған.
Іс бойынша сот және басқа да сараптамалар тағайындалды.
Қазір құқық қорғау органдары ықтимал күдіктілерді анықтап, шабуылдың техникалық іздерін зерттеп жатыр. Тергеу аяқталған жоқ.
