Бойдақ қыздар әйелі бар еркектерге неге әуес деген сауал төңірегінде белгілі журналист Ербол Мәндібек психологпен болған әңгімесін жариялап, жұрттың талқысына ұсынды деп жазады Democrat.kz.
"Бойдақ қыздар әйелі бар еркектерге әуес. Бүгін таксиге отырған психолог кісі осылай деді. Себебін сұрадым. Оның айтуынша;
"Маған 25-30 жас аралығында қыздар келеді. Олар көбіне еркектердің психологиясы туралы кеңес сұрайды. Бизнесмен еркектердің дүниетанымын зерттейді. Ақшалы жігіттерге ырбаңдаудың жүз түрлі амалын жаттаған",-деді.
Айтуынша, бұл кісіге қыздардың құрығына түскен бизнесмен жігіттер жиі келеді екен.
"50 жастағы еркек келді. Өзі тумысынан сараң екен. Бірақ қыз-қырқын десе алақаным ашылып кете береді",-деп еңіреп жылады дейді психолог апай.
Бір қызға айфон, алтын-палтын бәрін әперген. Бірақ анау қыздың запросы шарықтап кеткен. Квартира, машина алып бер деген. Мұны естіген сараңбайдың жүрегі тоқтап қала жаздапты.
"Өлләһи-билләһи енді қызға жоламаймын деп өзіне бірнеше рет серт берген. Бірақ, әдемі қыздар ырбаңдаса сынып қала берем",-деп көмек сұрапты.
Апайдың айтуынша, қырық жастан асқан
еркектер психологтың көмегіне көбірек жүгінуі керек. Тіпті болмаса әйелімен ашық ақылдасып ақыл сұраса да артық емес дейді.
Менің жасым 39-да. Қозы қарным, бір үйір кредитім бар. Ақшасы көп еркек болсам қандай болар екенмін деген ой келді. Кейде адамға кедейшіліктің де пайдасы бар. Битің ырғайдай болып жүргенде жан-жағыңа қарап та үлгере алмайды екенсің...." деп жазды Ербол_Мәндібек.
