Қазақстан мектептерінде қолданылатын цифрлық платформалардың саны 70-тен асқаны анықталды. Мұғалімдердің құжат толтыру жұмысын жеңілдету мақсатында Оқу-ағарту министрлігі бұл жүйелерді біріздендіруге кірісті. Жаңа бірыңғай платформа ұстаздарды бір мәліметті бірнеше жерге қайта енгізу әуресінен құтқаруға тиіс. Министрлік өкілдері бұл бастама туралы «Ашық алаң» бағдарламасында мәлімдеді, деп жазады Democrat.kz.
Қазақстанда педагогтердің жұмысын жеңілдетуге арналған бірыңғай цифрлық платформа құру жұмыстары басталды.
Оқу-ағарту министрлігі жүргізген мониторинг нәтижесінде білім беру саласында 70-тен астам ақпараттық жүйе мен цифрлық сервис қолданылатыны белгілі болған.
Бұл жүйелер электрондық журналдар мен күнделіктерді жүргізуге, оқушылардың үлгерімін бағалауға, сабаққа қатысуын тіркеуге, тамақтануын есепке алуға және өзге де міндеттерді орындауға арналған.
Министрлік мәліметінше, бір өңірде орта есеппен 10-ға жуық цифрлық жүйе қолданылады.
«Мектепте негізгі 3–4 платформа бар»
«Ашық алаң» бағдарламасында Астанадағы №104 «Келешек мектебінің» директоры Нұртас Жағабаев мектептердегі цифрлық жүйелерге қатысты пікір білдірді.
«Цифрлық платформаларды пайдаланып көрмей, олардың пайдалы не пайдасыз екенін айту қиын. Мектепте жүргізілетін негізгі 3-4 платформа бар. Қосымша жүйелер мектеп пен ұстаздың дамуы үшін жасалып жатыр», – деді ол.
Алайда министрлік жүргізген мониторинг мектептерде қолданылатын жүйелердің жалпы саны әлдеқайда көп екенін көрсетті.
Бұған дейін Оқу-ағарту министрі Жұлдыз Сүлейменова да бірқатар өңірде мұғалімдердің 15-ке дейін цифрлық платформамен жұмыс істейтінін айтқан болатын.
Сала басшысы жүйелердің қайталанатын қызметтерін анықтап, оларды біріктіру қажеттігін мәлімдеген.
Бір мәліметті бірнеше рет енгізу тоқтай ма?
Оқу-ағарту министрлігінің Орта білім беру комитеті төрағасының орынбасары Зейнеп Мақсұтованың айтуынша, Мемлекет басшысының тапсырмасына сәйкес бірнеше жұмыс тобы құрылған.
Қазір қолданыстағы цифрлық жүйелерді біріктіру жұмыстары жүргізіліп жатыр.
Жаңа тәсіл бойынша электрондық журналдар, білім беру платформалары, сабаққа қатысуды және тамақтануды есепке алу жүйелері Ұлттық білім беру деректер қорымен байланыстырылмақ.
Мұндағы мақсат — мұғалімдердің бір оқушы туралы мәліметті әртүрлі жүйеге қайта-қайта енгізуін болдырмау.
Мысалы, оқушы туралы дерек бір жүйеде тіркелсе, оны басқа платформада қайта толтырудың қажеті болмауға тиіс.
Үкімет платформаны енгізу жоспарын әзірледі
11 қарашада Үкіметте білім беру саласын цифрландыру мәселелері қаралды.
Премьер-министрдің бірінші орынбасары Нұрлыбек Нәлібаев өткізген кеңеске Оқу-ағарту министрі Жұлдыз Сүлейменова және өңір әкімдерінің орынбасарлары қатысты.
Жиында Оқу-ағарту министрлігі «Қазақтелеком» компаниясымен бірлесіп, өңірлерді Ұлттық білім беру платформасына кезең-кезеңімен қосу жоспарын әзірлегені хабарланды.
Жүйе мемлекеттік қызметтерді автоматтандыруға, ақпараттың дәлдігін арттыруға және бюджет қаражатының жұмсалуын ашық етуге бағытталған.
Сонымен қатар министрлік педагогтердің әкімшілік жүктемесін азайту үшін жасанды интеллект мүмкіндіктерін пайдалануды жоспарлап отыр.
Мұғалімдердің жұмысы шынымен жеңілдей ме?
Бірыңғай платформа әзірге толық іске қосылған жоқ. Сондықтан оның мұғалімдердің күнделікті жұмысын қаншалықты жеңілдететінін нақты бағалау ерте.
Жаңа жүйенің нәтижесі платформалардың санын қысқартумен ғана өлшенбейді.
Ең маңыздысы — педагогтерден сұралатын мәліметтердің қайталанбауы және электрондық есептерді толтыруға кететін уақыттың азаюы.
Бұған дейін министрлік мұғалімдер жүргізетін құжаттар санын 25-тен 5-ке дейін қысқарту жоспарын да жариялаған.
Енді сол өзгерістердің іс жүзінде қалай орындалатыны маңызды.
Өйткені цифрландырудың басты мақсаты мұғалімге тағы бір платформа қосудан емес, оның негізгі жұмысына — бала оқытуға көбірек уақыт қалдырудан көрінуге тиіс.
