Танымал мектеп директоры Ұстаздар күні қарсаңында мұғалімдерге көп сыйлық беретінін айтып, ата-аналарды педагог еңбегін бағалауға шақырды. Оның «альфа ұрпақпен оңай емес, оған кейде сіздер қосылып кетесіздер» деген сөзі әлеуметтік желіде ерекше назар аударып, ата-ана мен мұғалімнің мектептегі орны туралы пікірталасқа ұласты, деп жазады Democrat.kz.
Ақмоншақ Нұртаза әлеуметтік желідегі парақшасында алдағы Ұстаздар күніне орай мұғалімдерді қуантқысы келетінін жазған.
«Келе жатқан Ұстаздар күніне орай көп сыйлық беремін деп шештім. Ұстаздарды жақсы көремін, олардың еңбегін бағалаңыздар, құрметті ата-аналар!» – деген ол.
Директор жазбасындағы келесі сөйлем көпшіліктің назарын көбірек аударды.
Ол қазіргі балалармен жұмыс істеу мұғалімдерге оңай емес екенін айтып, ата-аналардың да кейде педагогке қосымша салмақ түсіретінін меңзеген.
«Оларға альфа ұрпақпен оңай емес, оған кейде сіздер қосылып кетесіздер. Ұлтыңыз болашағын ойласақ, ұстаздарды шаршатпау керекпіз, олар шабыттану керек», – деп жазды директор.
Жазба әлеуметтік желіде мұғалімнің қазіргі қоғамдағы жағдайы туралы түрлі пікірге түрткі болды.
Бір тарап директордың сөзін қолдап, қазіргі педагог тек балаға сабақ берумен шектелмейтінін, ата-ананың талабына, түрлі шағымдарға, есеп пен құжатқа да жауап беруге мәжбүр екенін айтады. Олардың пікірінше, мұғалімді үнемі сынға ала беру оның кәсіби ынтасына әсер етуі мүмкін.
Ал екінші тарап «мұғалімді шаршатпау» деген пікірді біржақты қабылдауға болмайтынын алға тартады. Ата-ана баласының оқуына, бағасына немесе мектептегі жағдайына қатысты сұрақ қоюға құқылы және мұндай сауал мұғалімге жасалған қысым ретінде қабылданбауға тиіс деген пікірлер де бар.
Әсіресе «альфа ұрпақ» туралы сөз бөлек талқыға түсті. Қазіргі мектеп оқушылары цифрлық ортада өскен, ақпаратты тез қабылдайды, сұрақты көп қояды және бұрынғы буынға қарағанда ересектердің беделін автоматты түрде мойындай бермейді деген түсінік жиі айтылады.
Сондықтан бүгінгі мұғалімге тек пәнді жақсы білу жеткіліксіз. Баламен тіл табысу, оның назарын ұстап тұру, ата-анамен дұрыс байланыс орнату да педагог жұмысының бір бөлігіне айналған.
Дегенмен бұл пікірталастың екінші жағы да бар: мұғалімнің беделін қорғау ата-ананың үнсіз қалуы дегенді білдірмеуге тиіс. Егер балаға қатысты нақты мәселе туындаса, ата-ана оны көтеруге құқылы.
Ақмоншақ Нұртазаның қысқа ғана жазбасы осылайша Ұстаздар күні қарсаңындағы құттықтаудан асып, қазіргі мектептегі үш тарап – мұғалім, бала және ата-ана арасындағы қарым-қатынас туралы үлкен әңгімеге ұласты.
