«24KZ» арнасының хабарлауынша, Қазақстанда оқушының мұғалімге деген құрметсіздігі үшін ата-аналарға 86 500 теңге көлемінде айыппұл салынуы мүмкін деп жазады Democrat.kz.
Оқу-ағарту министрлігінің түсіндіруінше, балағат сөздер айту, әдепсіз ишаралар көрсету және ұстаздың кәсіби міндетін атқаруына кедергі келтіріп, жұмыс істеуіне қолайсыз жағдай туғызу құқық бұзушылық болып саналады.
Егер мұндай әрекет әкімшілік жаза қолданылғаннан кейін бір жыл ішінде қайталанса, айыппұл мөлшері 130 мың теңгеге жуықтайды.
Набира Марбанова, ҚР Оқу-ағарту министрлігі Ақпараттық қамтамасыз ету департаментінің бас сарапшысы:
«Қазіргі таңда педагогтерді өз міндетіне жатпайтын жұмыстарға жегуді тоқтату және олардың құқығын сенімді қорғау мақсатында заңнаманы күшейту жұмыстары жүргізіліп жатыр. «Педагог мәртебесі туралы» заңда мұғалімдердің құқықтары мен міндеттері, сондай-ақ оларды қандай істерге тартуға болмайтыны нақты көрсетілген. Ал ұстаздың ар-намысына тиіп, құрметсіздік көрсеткені үшін жауапкершілік заңнаманың басқа нормаларымен реттеледі. Мұндай әрекеттер үшін айыппұл бірден қолданылады».
Министрлік елімізде мұғалімдердің кәсіби қызметіне қажетті жағдай жасайтын ерекше мәртебесі бар екенін еске салды. Құжатта олардың құқықтары, еңбекақы төлеу, сыйақы беру және әлеуметтік кепілдіктерге қатысты нормалар бекітілген.
