Іле-Балқаш резерватына Амур атты аталық амур жолбарысы жіберілді. Бұл — Қазақстанда жолбарыстарды тарихи мекеніне қайтару бағдарламасы аясындағы екінші маңызды қадам, деп жазады Democrat.kz.
2026 жылғы 31 қазанда Іле-Балқаш мемлекеттік табиғи резерваты аумағында Амур атты жолбарыс табиғи ортаға жіберілген. Экология және табиғи ресурстар министрлігінің мәліметінше, бұған дейін осы бағдарлама аясында Үміт атты ұрғашы жолбарыс табиғатқа жіберілген болатын.
Жолбарыстар Қазақстан аумағындағы табиғи ортада 70 жылдан астам уақыт бойы кездеспеген. Оларды қайта жерсіндіру үшін Оңтүстік Балқаш өңірінде ұзақ мерзімді дайындық жүргізіліп келеді.
Амур табиғатқа жіберілгенге дейін арнайы бейімдеу қоршауында ұсталып, ветеринариялық тексеруден өткен. Мамандар оның денсаулығын, аң аулау дағдыларын және адамның қатысуына реакциясын бағалаған.
Жануардың қозғалысын бақылау үшін оған спутниктік қарғыбау тағылған. Бұл мамандарға оның жаңа ортаға бейімделуін және қозғалыс бағытын қадағалауға мүмкіндік береді.
Бағдарлама тек жолбарыстарды жіберумен шектелмейді. Олардың табиғи жағдайда тіршілік етуі үшін қорек болатын жануарлардың санын арттыру, тоғайлы ормандарды қалпына келтіру және табиғи мекендерді қорғау қажет.
Сонымен қатар жергілікті тұрғындардың қауіпсіздігіне де назар аударылып отыр. Арнайы топ жануарлардың қозғалысын бақылайды және адам мен жыртқыш арасындағы ықтимал қақтығыстардың алдын алуға бағытталған жұмыстар жүргізеді.
Амурдың табиғатқа жіберілуі — ұзақ мерзімді экологиялық жобаның кезекті кезеңі. Оның нәтижесі жануарлардың бейімделуіне және өңірдің экожүйесін қалпына келтіру жұмыстарына байланысты болады.
