Солтүстік Қазақстан облысының Шаховское ауылында бір апта ішінде шамамен 13 мың қаз, үйрек пен тауық өлді. Ветеринарлар сынама алып, зертханаға жіберді, ал тұрғындар карантин енгізуді талап етіп отыр, деп жазады Democrat.kz.
Ауыл тұрғындарының айтуынша, ауру жұққан құстар тепе-теңдігін жоғалтып, құлап, қайта тұра алмай қалады.
Кейбірінде іш өту, мазасыздық және денесіндегі жаралар байқалған.
Құс өсіру көптеген ауыл тұрғындары үшін негізгі табыс көздерінің бірі болғандықтан, жаппай өлім отбасыларға айтарлықтай қаржылық шығын келтіріп отыр.
Ветеринарлар сынамаларды зертханаға жіберді. Нақты диагноз зерттеу аяқталғаннан кейін белгілі болады.
Облыстық ветеринария басқармасы құстардың бір бөлігі шілдеде Башқұртстаннан ветеринариялық құжаттарсыз әкелінгенін хабарлады.
Мамандар әзірге жағдай құс тұмағына ұқсамайтынын айтып отыр. 2025 жылы осы ауылда пастереллез тіркелген. Қазіргі жағдайдың да сол инфекцияға қатысы болуы мүмкін деген болжам бар, бірақ зертханалық нәтиже шықпайынша диагноз қоюға болмайды.
