Білікті ұстаз, белсенді педагог Гүлжазира Искакова "диктант жазамыз" деп қуанғандар туралы пікір білдіріп, ескі мен жаңаны салыстырып, жазба жариялады деп жазады Democrat.kz.
"Мемлекет басшысы орта білімге Жасанды интеллектіні енгізу туралы Жарлыққа қол қойды. Прогресс пе? Прогресс! Бірақ бұл жаңалық «баяғыда білім мықты еді» деп, советтік мектептің шаңын аңсап жүргендердің ұйқысын тағы қашырған сияқты.
Оларға салсақ, баланың бақыты - ЖИ емес, 45 минут бойы бас көтермей диктант жазу мен сия сорғыш қағаздың құдіретінде. Осы «ескі жағалауды» аңсаушыларға бір-екі ұсынысым бар еді:
LRT-ға мінбеңіздер! Ол тым заманауи, ішінде «советтік» рух жоқ. Одан да ескі пазикке мінген дұрыс - есігі жабылмайтын, бензин иісі аңқып тұратын... Нағыз романтика сонда!
БЖБ мен ТЖБ-ны алып тастап, орнына... «екілік» қояйық. Күнделікке қып-қызыл етіп «2» қойып, ата-анасын мектепке шақырған қандай ғанибет! Қазіргі балалар «критерий» мен «дескрипторды» біледі, ал біз «қорқыныш» дегенді білуші едік. Қандай білім, иә?
Gemini мен ChatGPT-ді мүлдем жауып тастау керек! Ол не деген сұмдық? Сұрақ туындаса, тез арада 1980 жылғы энциклопедияны ақтарып, кітапханада 3 күн қону керек. Білім деген - азаппен келуі тиіс, оңай жолмен емес!
Логика қызық:
Әлем Марсты игеріп, ЖИ-мен күрделі операциялар жасап жатқанда, біз әлі де «силосты қалай бастыру керек» деген тақырыпта диктант жазғызып отыруымыз керек пе? Қауырсын қаламмен нейрожеліге қарсы соғысу - жел диірменмен алысқан Дон Кихоттың кейпін еске түсіреді.
Заманның көшіне ілесе алмағандарды мазаламаңыздар. Олар ертең LRT-ның жанынан ат арбамен өтіп бара жатып: «Міне, нағыз сапалы, сенімді көлік!» деп тамсанып тұратынына сенімдімін.
Ал біз заманмен бірге алға кетеміз. Өйткені Ыбырай бізге «ескіге жабысып қал» емес, «өнер-білім бар жұрттардан үлгі ал» деп кеткен.
Сіз қай жағалаудасыз? LRT-да ма, әлде ат арбада ма?"деп жазды Гүлжазира Искакова.
