Аягөз қаласы жылыту мерзіміне биыл да дайын болмады. Былтыр ескі құбырлар қара күзде бір мәрте, қыс ортасында екінші мәрте жарылып халық жылусыз қалған. Аягөз ауданы әкімдігі сол оқиғадан сабақ алмады.
Әкімдіктің тұрғынүй-коммуналдық мемлекеттік мекемесі «Орталық» қазандық пен құбыр жүйесін күрделі жөндеу үшін «МИТ Теплосервиспен» 1,5 млрдқа жуық теңгеге жасалған келісімшартын және 571 млн теңгеден астам сомаға «СМУ ШЫҒЫСпен» жасалған келісімшартын маусым айында прокуратура заңсыз деп тапты.
Одан кейін жылу жүйесін оңдауға жаңадан тендер өтпеді. Соның кесірінен жаз айларында жөндеу жұмыстары жасалмады.
Аягөздегі дереккөздің мәлімдеуінше, қаланың жылыту жүйесін жөндеу қыркүйек айында әзер басталды.Онда да жұмыс бірде тоқтап қалады, араға уақыт салып қайта жанданады.
Жөндеу жұмыстарына қажет қаржы қайдан бөлінгені белгісіз. Кейбір мәліметте Аягөздің жылыту жүйесін жөндеуге қажет қаржы Үкімет резервінен бөлінгені айтылады.
Жөндеумен айналысып жатқан қандай фирма екені де түсініксіз. Нақты келісімшартпен міндеттеме алмаған соң жылыту жүйесін жөндеудің сапасы да нашар, жауапты шаруаға салдым-бардым салғырт қарайды ғой мұндай фирмалар.
Мұның дәлелін жергілікті тұрғындар түсірген видеодан көруге болады. Қазірдің өзінде тұрғындар қатты тоңып отыр.
Суыққа шыдай алмаған балабақшалар жабылды. Ертең күн қатты суытса, онда Аягөз халқының жағдайы тіпті мүшкіл болады ғой...
