Танымал журналист, ақын Бақытжан Қосбармақов бірнеше күннен бері қоғамда үлкен талқыға түскен әріптесі Танакөз Толқынқызының жазбасына қатысты пікір білдіріп, жұрт білмейтін ақынның бір қасиеті туралы айтты деп жазады Democrat.kz.
Бақытжан Қосбармақов өзінің әлеуметтік желідегі парақшасында: "Танакөзге берген уәдемді бұзуға тура келді. 2022 жыл, жаз.
Мессенжеріме «Бақытжан, сәлем. Халың қалай?
Телефон нөміріңді жазшы.
Менікі: …
Мүмкіндік болса, хабарласшы» деген хабарлама келді.
Танакөз Толқынқызынан екен.
Сырттай ғана білетінмін. Сол сәтте 1990-жылдары «Ақ желкен» журналында істеп жүргенімде бірер рет көргенім есіме түсті. Фариза апайға келді, әлде редакцияға өлеңдерін әкелді. Онда 2-мектепте оқиды, әлде студент болатын. Фамилиясы – Ілиясова еді.Хабарластым. Амандық-саулықтан соң, жақында «Алаш» сыйлығын алғанын, 160 мың теңге ақшалай жүлде бергенін, соны түгел «Тамшы» қорына аударғысы келетінін айтты. Ақшаны салатын шот, каспи нөмірімді сұрады. Және сол бойда аударды.
Сөз арасында бір өтініш айтты: «Бақытжан, осы әңгіме осы жерде қалсын, ешкімге айтпай-ақ қой. Бұл – менің қаңтаршыларға азғантай көмегім, қазір қолымнан келгені – осы. Маған рахмет те айтпа. Мұны әлеуметтік желіге де жазба» деді. «Құп» деп, келістім.
Енді бүгін сол уәдемді бұзып отырмын.
Мен уәдемді неге бұздым? Бұзған себебім – 2-3 күннен бері Танакөзді қаралап, ғайбаттаушылар үдеп барады, әлен де пәлен, пәлен де түген, «қазақты қорлады» дейді бірі, бірі «қазақты менсінбейді» дейді.
«Сотқа беру керек!» деп өрекпіп жүргендер де бар. Қарғап-сілеп жатқандар қаншама?! Ерқанат Көпжасарұлы деген журналист «Сен кімсің?!» деп дігірлеп, шүйлігіпті.
Қазақты менсінбейтін адамның өстіп қазаққа жаны аши ма?! Қазақты қорлайтын адам Қаңтарда қор болған қазаққа өстіп қарлығаш көмегін жасап, аузынан жырып беріп, қол ұшын соза ма?!
Әділетке жүгінетін, ақиқатқа жығылатын санасы бар адам өзі түсінер.
Мен білетін Танакөз – осы, осындай!
Бар бол, Танакөз! Сендей қызы, сендей ақыны барда қазақ құрымайды, өлмейді!"деп жазды.
