Бейжіңде бес жастағы қыз ойын үстінде ұзындығы шамамен төрт сантиметр, салмағы 50 грамға жуық алтын құймасын жұтып қойған. Дәрігерлер бөгде зат баланың асқазан-ішек жолында тұрып қалса, ішкі ағзаларды зақымдап, қан кетуге әкелуі мүмкін екенін айтып, шұғыл эндоскопиялық операция жасаған, деп жазады Democrat.kz.
Оқиға Қытай астанасы Бейжіңде болған. South China Morning Post басылымының мәліметінше, бала алтын құймасымен ойнап отырып, оны байқамай жұтып қойған.
Алғашында ата-анасы бөгде зат табиғи жолмен шығып кетеді деп күткен. Алайда арада алты сағат өтсе де, жағдай өзгермеген соң қызды ауруханаға жеткізген.
Дәрігерлерді алтынның көлемі мен салмағы алаңдатқан. Ұзындығы шамамен төрт сантиметр болатын 50 грамдық металл асқазан немесе ішек жолында тұрып қалуы мүмкін еді.
Мамандар мұндай жағдайда асқазан-ішек жолының қабырғасы жарақаттанып, тіпті ішкі ағзалардың жыртылуы мен қан кету қаупі туындайтынын ескерткен.
Сондықтан дәрігерлер құйманың өздігінен шығуын күтпей, шұғыл эндоскопиялық процедура жасауға шешім қабылдаған.
Операция кезінде баланың аузы арқылы камерасы бар жіңішке әрі икемді түтік енгізіліп, алтын құймасы асқазан қуысынан табылған. Бірнеше минуттық әрекеттен кейін дәрігерлер оны арнайы құралмен ұстап, абайлап сыртқа шығарған.
Бақытымызға қарай, металл баланың ішкі ағзаларын зақымдап үлгермеген. Қыз операциядан кейін тез қалпына келіп, денсаулығына айтарлықтай қауіп төнбегені хабарланды.
Бұл оқиға кішкентай балалардың қолы жететін жерде ұсақ қана емес, ауызға салуға болатын кез келген затты қалдырмау қажеттігін тағы бір еске салды. Өйткені бала үшін ойыншық болып көрінген қарапайым зат санаулы секундтың ішінде өміріне қауіп төндіруі мүмкін.
