Қоғам белсендісі Алма Казтаевна қазіргі қоғамда болып жатқан маңызды мәселеге қатысты пікірімен бөлісті деп жазады Democrat.kz.
"Осыған дейін бір жақты ата- ананы кінәлай беріппіз . Балаларын орыс мектебіне,класына берді деп. Сөйтсек, үйіне жақын мектептерден қазақ сыныбынан орын болмай, еріксіз орыс сыныбына кеткен балаларды есепке алмаппыз.
Қаншама қаракөздеріміз солай орысша көмейінен бүлкілдемесе де орыс сыныбына барып, қарапайым сұраққа өзге тілде жауап бере алмай , намысшыл қазақ балалары өзге ұлттың алдында талай пұшайман болғанын айта да алмаппыз.
Барлық ата- ананың көзі ашық емес, қарапайым шаруа адамдары оларға үкімет адамы не десе де бас шұлғиды. Міне, біздің қасіретіміз қайда жатыр?" деп жазды Алма Қазтаевна.
"Қазақ баласын орысша оқытуға берді" деп байбалам сала береміз. Әйтсе де, мәселенің екінші жағына назар аударып көрдік пе?
Алма Қазтаевнаның пікірінің дәлелі ретінде бір ғана мысал келтірейікші.
Алматы қаласындағы Түрксіб ауданында таза қазақ тілінде білім беретін мектеп саны санаулы ғана.
Түрксіб ауданының орталығы саналатын Шолохов пен Ақан Сері көшесінің қиылысының микроучаскесінде бір ғана №59 қазақ мектебі бар. Бітті. Ол мектепте мүлде орын жоқ. Ал осы микроучаскедегі басқа мектептің түгелі аралас немесе орыс мектептері.
Енді есептеп қараңыз, Шолохов көшесінен Мағжан Жұмабаев көшесіне дейінгі аралықта қазақ мектебі жоқ. Шолоховта тұратын шеше баласын жақын жердегі аралас мектепке немесе орыс мектебіне бермегенде қайтсін?
Әлде таң атпай баласын сүйреп, келесі ауданның мектебіне таси ма? "Қазақ баласын орысша оқытты" деп жұртты кінәламас бұрын, бәлкім, қазақ мектебі жеткілікті ме деген сұрақтың жауабын іздеген дұрыс болар, сіз қалай ойлайсыз?
