Қазақ дінін қорғау үшін шекара асып кеткен бе?

14 тамыз 2024

2142

Қазақ дінін қорғау үшін шекара асып кеткен бе?

Журналист Нұрсейіт Жылқышыбаймен болған сұхбатында уағызшы Дарын Мубаров қандай сұрақтарға жауап берді? Democrat.kz. журналисі сұхбаттың толық видеосын қарап шығып, қысқаша жазып шықты. Бірден айтып өтейік, журналист маңызды сұрақты өте ұтымды қойып отырды. Алайда сұхбаттасы судағы балықтай кез келген сұрақтың жауабына нақты жауап бермеудің бүкіл тәсілін жасап бақты. Мысалы, журналистің "Домбыра, беташар, жар-жар, сыңсу харам ба?" деген сұрағына: "Негізінен дінде музыкалық аспаптарға тыйым салынатынын" айта келіп, күйші Дина Нұрпейісованы тілге тиек етеді. Жауап қандай? Негізі түпкілікті жауап - харам ғой. Алайда көрерменнің сұрақ-жауапты қорытуына өте қиын сұхбат. Алайда көп әйел алу мәселесінде Дарын Мубаров бұл мәселені қолдайтынын ашық білдірді. Тіпті өз қызын екінші әйел етіп тұрмысқа беруге қарсы болмайтынын да айтты. Қайрат Сатыбалды, Бекболат Тілеухан, Мұхамеджан Тазабектерге қатысты сұрақ та ешбір салмақсыз жауапқа ие болды. Аты аталған азаматтармен 1-2 рет қана кездейсоқ кездесіп қалғандай, аса бір тығыз байланысы болмағандай сипай жауап берді.

"Батырлар дін үшін соғысты ма, жер үшін бе?" деген сауалға "Дін үшін де соғысты. Жер үшін де соғысты. Жағдайға қарай болды ғой. Монғол. жоңғар шапқыншылығында әрине, жер үшін соғысты. Екінші кеңес үкіметі келіп,орыстар біздің жерімізге келіп жатқанда, біз білеміз, біраз қазақтар Қытай, Үндістан, Түркия, Еуропаға көшті. Олар не үшін кетті?" деген Дарын Мубаров "оларда шара қалмады. Олардың арасында таразының басына елі мен діні түсті. Елінде қалып, дінінен ажырау керек болды. Болмаса, дінімді сақтаймын деп елінен ажырау керек болды. Міне, сол үшін олар дінін қорғаймын деп, көзінің жасын тия алмай, елінен алыстағанын жасыра алмаймыз" деген сыңайда жауап береді.

Қазір ешбір ресми жұмыс істемейтін Дарын Мубаров 40 шақты адамнан тұратын отбасын қалай бағып отыр? Сөзіне сенсек, Дарын Мубаров күн сайын 40 сұраққа жауап береді екен. Сол атқарған қызметі үшін кәсіпкер достары қаржылай көмек беретін көрінеді. Фото интернеттен алынды.