Қазақстанда автонесиенің бірнеше жыл бойы өте жылдам өсуі проблемалық қарыздардың көбею қаупін туғызды. Ұлттық банк бұл нарықта несиелер сапасының «кейіннен нашарлау» тәуекелі бар екенін ескертті, деп жазады Democrat.kz.
Ұлттық банктің қаржылық тұрақтылық жөніндегі есебінде автокредит нарығына жеке назар аударылған.
2025 жылы банктер қазақстандықтарға шамамен 2,4 трлн теңгенің автонесиесін берген. Жалпы автокредит портфелі 4 трлн теңгеден асып кеткен.
Реттеушінің бағалауынша, борыш жүктемесі коэффициентіне қатысты бұрынғы жеңілдіктер автомобиль несиесінің қарқынды өсуіне ықпал еткен.
Алайда қарыз көлемінің тез ұлғаюы кейін төлем мерзімін өткізіп алатын клиенттер үлесінің өсуіне әкелуі мүмкін.
Ұлттық банк қазірдің өзінде автонесиелер арасында кешіктірілген төлемдер көбейгенін атап отыр.
Бұл автокредит беруді тоқтату туралы шешім емес. Дегенмен реттеушінің ескертуі банктер болашақта клиенттердің төлем қабілетін қатаңырақ бағалауы мүмкін екенін көрсетеді.
