Әлеуметтік желіде Оқу ағарту министрлігінің шығарған жаңа бұйрық жобасы қызу талқыланып жатыр деп жазады Democrat.kz.
Оқу-ағарту министрлігі талқылауға шығарған бұйрық жобасында жалпы білім беретін мектептің 1-сыныбына арналған «Конституция әлеміне саяхат» оқу құралы ұсынылған. Осыған байланысты белсенді ұстаз Бижомарт Қапалбек: "Бұл – білімді саясаттандырудың тым тұрпайы түрі.
Мәселе Конституцияның маңызды не маңызды еместігінде емес. Әрине, бала өз құқығы мен міндетін білуі керек. Бірақ кеше ғана мектеп табалдырығын аттап, әріп танып жүрген алты жастағы баланы «Конституция әлеміне саяхатқа» шығару кімге және не үшін қажет?
Бірінші сынып – құқықтық терминдер мен ересектерге арналған ұғымдарды бала санасына тықпалайтын тәжірибе алаңы емес қой.
Бұл кезеңде бала ең алдымен хат танып, дұрыс оқып, оқығанын түсініп, ойын ана тілінде жеткізе білуі керек. Айналасын, табиғатты, адамды, қоғамды біртіндеп танып, дүниені тұтас қабылдауы қажет. Кезінде Ақаң салған арнаның өзегі де осы еді ғой. Ақымет Байтұрсынұлы мен Телжан Шонанұлының бастауышқа арналған «Оқу құралында» табиғат, еңбек, қоғам, адамдық қатынастар мен елдік ұғымдар жеке-жеке жасанды пәндерге бөлінбей, баланың жасына лайық мәтіндер арқылы танытылған. Өйткені бала әлемді алдымен мәтін, әңгіме, әрекет және айналасындағы өмір арқылы таниды.
Конституциялық тәрбие де бірінші сыныпта «Әліппе», «Ана тілі», «Дүниетану» мазмұнына табиғи кіріктірілуі керек. Өзгені сыйлау, әділ болу, тәртіп сақтау, жауапкершілікті сезіну – бала үшін Конституцияның ең түсінікті бастауы осы.
Конституция әр өзгерген сайын оған жеке оқулық арнай беру – баланың санасына артық жүк. Бұл – баланың жасын, танымын және оқу жүктемесін елемейтін педагогикалық жауапсыздық.
Оқу-ағарту министрлігі бірінші сыныпты ересектердің идеяларын сынайтын полигонға айналдырмауы керек. Алдымен балаларымызға дұрыстап хат танытып, оқығанын түсінуді үйретіп алайық! Ал Конституция оның алдынан ертең өзі-ақ шығады", - деп жазып, пікір білдірді.
Автордың бұл жазбасына қатысты әріптестері мен ата-аналар "Жөн сөз! Әлемде мұндай пәнді мейлі факультатив болсын, санасы толық қалыптаса бастаған, кәмелетке толып азаматтық куәлік алуға аяқ басқан 15-16 жастағы жеткіншіктерге оқытады ғой. Оң мен солын енді тани бастаған бүлдіршіндерге құқық, саламаттық, өзін-өзін тану сияқты пәндерді тықпалау - педагогикаға жат",
"Құрысын.Құрттай балаға обал ғой.Ең болмаса,4- сынып болсын да,онда да мультфильм түрінде жеңіл түсіндіру керек", "
1-сыныпта оқушының мектепке бейімделуі 3 айдан 6 айға дейін созылады.Қазақша айтқанда көбі есеңгіреп жүреді. Біраз сөздердің мағынасын түсінбейді.”Әліппе” әлемін игеріп алса соған қуанамыз.
5-сыныптан бастап “Жаһандық құзіреттілік”деген аты мен заты былыққан пән оқытылады.Пәннің атауы мен ондағы мәтіндерді ешкім түсіндіріп бере алмайды.
Енді “Конституция әлеміне саяхат”!Қазіргі 6 жасар балалардың конституция деген сөзге тілі келеді дегенге күмәнданамын.Миын ашытпайықшы!Осыны кіргізейік деген автор бала оқытып көрмеген,зумер ұрпақтың мінезінен бейхабар,альфа ұрпақтың қандай болатынынан бейхабар жан деп ойлаймын",
"Жөні осы! Әліппені жаңа қолына алған бала тек деректі ұғымдарды меңгеруі тиіс. Бұл пән баланың оқуға деген қызығушылығын жойып жібереді. Бала пән ауыр деп ойламайды, өзінің түсінігі төмен деген күмән туындайды" деген пікірлер жазып жатыр.
