Эстония 1 қазаннан бастап Ресей мен Беларусьтен шыққан астықтың өз аумағы арқылы транзитіне тыйым салды. Таллин бұл шешімді Ресей экономикасына түсетін сауда кірістерін шектеуге бағытталған шара деп түсіндірді, деп жазады Democrat.kz.
Эстония үкіметінің жаңа шектеуі бүгін күшіне енді.
Тыйым Ресейде немесе Беларусьта өндірілген астықты Эстония аумағы арқылы үшінші елдерге тасымалдауға қатысты.
Эстония сыртқы істер министрі Маргус Цахкна ел Ресейдің соғыс экономикасына табыс әкелуі мүмкін сауда ағындарына көмектескісі келмейтінін мәлімдеді.
Шешім Балтық өңіріндегі логистикалық бағыттардың өзгеріп жатқан кезеңінде қабылданды.
Reuters мәліметінше, Қара теңіздегі тасымал тәуекелдерінің артуына байланысты ресейлік компаниялар астық экспортын Балтық және Арктика порттарына көбірек бағыттай бастаған.
Эстонияның шешімі Ресей экспортының барлық көлемін тоқтатпайды, бірақ Балтық елдері арқылы өтетін логистикалық мүмкіндіктердің бірін жабады.
