Абай облыстық мәслихатының депутаты Риза Молдашева мұғалімдерді газетке жаздырту мәселесін көтеріп, Оқу ағарту министрі Жұлдыз Сүлейменоваға үндеу жасады деп жазады Democrat.kz.
Әлеуметтік желідегі парақшасында Риза Молдашева "мұғалімдерді газетке жаздыртудың қылмыс" екеніне таңғалғанын жасырмайды.
Өз жазбасында ол: "Қазақстан Республикасының Оқу-ағарту министрі
ЖҰЛДЫЗ ДОСБЕРГЕНҚЫЗЫ СҮЛЕЙМЕНОВАНЫҢ назарына !
ҚР Оқу ағарту министрлігіне қарасты білім сапасын қадағалау комитетінің төрағасы Серік Әшіровтың :”мұғалімдерді газетке жаздырту - қылмыс” дегенін естіп таң қалып отырмыз.
Осы орайда бізден бір сұрақ бар:
Егер мәжбүрлемесе мұғалімдердің қаншасы газетке өз еркімен жазылады?
Ащы болса да шындық:
ешкім айтпаса -ешкім жазылмайды. Айтса -“ мәжбүрледі “ деп шу шығарады.
Сенбілікке шықса - қылмыс.
Газетке жазылса - қылмыс.
Аттестациядан өткізу - қысым.
” Әлеуметтік желі жеткілікті “ дейді. Иә, жеткілікті, тек желдей ұшып, желмен жоғалатын ақпаратқа толы…
Ал газет - ой.
Газет - талдау.
Газет - тәжірибе.
Ол сторис емес, ертең өшіп қалатын…
Мәселе мәжбүрлеуде емес.
Мәселе - оқуға дағдылануда.
Оқымайтын қоғамнан
ойлайтын ұрпақ шықпайды.
Газетке жазылу - зорлық емес,
ол - кәсіби мәдениет.
Ал мәдениет өздігінен келмейді.
Оны қалыптастыру керек.
Сондықтан ізгілікті істің бәрін «қылмыс» деп атағанша, мұғалімді айқайдың ортасынан алып шығып, ойдың ортасына қайтарсақ қайтеді?"дейді.
Депутаттың осы жазбасына қатысты журналист Сабырбек Олжабай: "Ұстазбын деп көкірегін ұрып жүргендердің бірқатары кітап оқымайды. Оқулықтың өзін шала- шарпы шолады.
Шәкіртіне сонда олар не түсіндіреді. Газет- журнал оқымайтын, театрға бармайтын шала сауатты мұғалім тәрбиелеген оқушылар елге тұтқа бола алады ма? Оқу- ағарту министрі осы жағын ойланса нетті?"деп пікір жазды.
Мұнан бөлек, осы көтерілген мәселеге қатысты "ешкім мәжбүрлемей, газетке өзі жазылып жүргенін" айтқан мұғалімдер мен "газетті жаздырып, үнемі оқып отыратын мұғалімнің білімі де терең болатынын" айтқан пікірлер тоқтаусыз жазылуда.
