Белсенді педагог, білікті ұстаз Гүлжазира Ысқақова өзінің әлеуметтік желідегі парақшасында Оқу ағарту министрі Жұлдыз Сүлейменоваға сұрау салып, үндеу жасады деп жазады Democrat.kz.
Өз жазбасында Гүлжазира Ысқақова: «Идеяшыл Министр» және төрт дағдының «жаңа» жыры.
Бүгін біздің министр ханымның бас-көз жоқ 4 дағдыны ауыстыру керек деген “ұсынысы” желдей есті…
Жұлдыз Сүлейменова, бұл идеяңызбен келіспеймін. Былықтырып жатқаныңыз аздай, мынау не сұмдық?
Осы келеңсіздік орын алатын болса, Президентке Е-Өтініш жазамын немесе кіремін.
Біздің білім жүйесінде тағы да тренд - Оқылым, Тыңдалым, Айтылым, Жазылым деген ғылыми терминдерді баяғы Оқу, Тыңдау, Айту, Жазу деген механикалық етістіктерге қайта өзгертпекші. «Тілді жеңілдеттік» деп бөрікті аспанға ату — кезекті қателік.
Мен тәжірибелі мұғалім ретінде бұған үзілді-кесілді ҚАРСЫМЫН! Бұл мектепті ғылыми категориядан ажырату. Әрекет пен Дағдының айырмасы: Оқу мен Жазу - жай ғана механикалық процесс (әріп тану, қалам тербету). Ал - лым/-лім жұрнағы оның артында тұрған интеллектуалдық құзыреттілікті, терең логикалық дағдыны білдіреді. Халықаралық парадокс: Бізді PISA, PIRLS - деп ұрандатып, әлемдік стандартқа сүйрейді. Бірақ халықаралық жүйедегі Reading, Listening, Speaking, Writing жай ғана әрекет емес, жүйелі категория. Терминологияны балабақша деңгейіне түсіріп тастап, әлеммен қалай бәсекелесеміз?
Ғылыми негізі бар терминді құр етістікке айналдыру - білім сапасын емес, тек қағаздағы сөзді өзгертеді. Ахаңның (А. Байтұрсынұлы) «дыбысты тізу» логикасы тілдің терең жүйесін меңгерту еді, ал біздікілер терминді жұтаңдатуды реформа көріп отыр. Министр ауысқан сайын сөз ауыстырып, ғылымды ойыншыққа айналдырғанды қашан қоямыз?", - деп сұрақты төтесінен қойды.
