2026 жылы «Қазақмыс» корпорациясы геологиялық барлау жүйесін жаңартуға бағытталған ауқымды бағдарламаны іске қосады. Жоба геологиялық-маркшейдерлік жұмыстарды цифрландыруды және Жезқазған қаласында жаңа инфрақұрылым құруды қамтиды.
Бұл шешім компанияның бес кенішінде Micromine бағдарламасы арқылы жүргізілген ішкі талдау мен тәуелсіз аудит нәтижесінде қабылданды. Тексеру барысында есептеулердің көп жағдайда 2D форматында жүргізілетіні анықталып, бұл модельдеу мен болжау мүмкіндіктерін шектейтіні белгілі болды.
Осыған байланысты 2026 жылдан бастап компания толыққанды үш өлшемді геологиялық модельдеуге көшеді. Цифрландыру бағдарламасы аясында шамамен 400 маманды Micromine Origin & Beyond жүйесімен жұмыс істеуге оқыту жоспарланған. Ал тәжірибелі мамандар үшін Micromine Advance бағдарламасы бойынша тереңдетілген курстар ұйымдастырылады.
Сонымен қатар компания Geobank орталықтандырылған деректер жүйесін енгізуді жоспарлап отыр. Бұл геологиялық ақпаратты бір базаға жинақтап, кен қорын есептеу дәлдігін арттыруға және өндірісті жоспарлауды жетілдіруге мүмкіндік береді.
Жоба аясында Жезқазған қаласында жалпы ауданы 14 мың шаршы метр болатын геологиялық кластер салынып жатыр. Кешен құрамына заманауи керн сақтау қоймасы, зертханалар, оқу аудиториялары және ғылыми инфрақұрылым кіреді.
Керн сақтау қоймасын басқару ALS халықаралық компаниясымен, ал білім беру бағыты Colorado School of Mines университетімен серіктестік аясында жүзеге асырылады.
Жаңа геокластер шамамен 200 жаңа жұмыс орнын ашуға мүмкіндік береді.
Мамандардың айтуынша, бұл бастама геологиялық барлаудың толық циклін қалыптастырып, өндірісті жоспарлаудың дәлдігін арттыруға және минералдық-шикізат базасының тұрақты дамуын қамтамасыз етуге бағытталған.
