2026 жылы «Қазақмыс» корпорациясында өнеркәсіптік қауіпсіздік және еңбекті қорғау саласындағы жаңартылған стратегия іске асырыла бастайды. Бұл туралы компания басшылығы еңбек ұжымымен өткен кездесулер барысында хабарлады.
Жаңа стратегия қауіпсіздікті басқару жүйесін нығайтуға, цифрлық шешімдерді енгізуге және барлық деңгейдегі қызметкерлердің жеке жауапкершілігін арттыруға бағытталған. Сонымен қатар өндірістік тәуекелдерді азайту, қауіпсіз мінез-құлық мәдениетін қалыптастыру және жұмыскерлердің ақпараттандырылуын күшейту көзделіп отыр.
Компанияда басты қағида ретінде адамның өмірі мен денсаулығына басымдық беру белгіленген. Осыған байланысты кез келген өндірістік тапсырма қауіпсіздік талаптарынан жоғары қойылмайды. Егер жұмыскер өзінің немесе әріптесінің қауіпсіздігіне қауіп төнгенін байқаса, жұмысты тоқтатуға құқылы.
Жаңартылған стратегияда ашықтық мәселесіне ерекше назар аударылады. Өндірістік нысандардың басшылары жазатайым оқиғаларды жасырған жағдайда жауапкершілік күшейтіледі. Бұл тәртіптік шара қолдануға немесе еңбек шартын бұзуға дейінгі шешімдерге әкелуі мүмкін.
Компания өкілдерінің айтуынша, жарақаттану деңгейін төмендету жоспарлы және жүйелі жұмыстың, сондай-ақ барлық қатысушылардың бірлескен әрекетінің нәтижесінде ғана мүмкін.
Жаңартылған өнеркәсіптік қауіпсіздік стратегиясын жүзеге асыру «Қазақмыс» компаниясының тұрақты дамуының маңызды бөлігі ретінде қарастырылып отыр.
