Белсенді педагог Сәния Нүсіпәлі мұғалімдердің құжаттарына тағы бір жұмыс жоспары қосылғанын айтып, Оқу-ағарту министрлігіне ашық сауал жолдады. Оның сөзінше, оқушылардың үлгерімі 100 пайыз болған күннің өзінде ұстаздардан «Үлгерімі төмен оқушымен жұмыс» атты құжат талап етіледі. Педагог мұндай жоспардың кімге, қандай өлшеммен жасалатынын сұрап, білім саласында мәселені шешуден бұрын құжат дайындау әдетке айналғанын сынға алды, деп жазады Democrat.kz.
Қазақстандық педагог Сәния Нүсіпәлі Facebook парақшасында мұғалімдердің құжаттық жүктемесіне қатысты өткір мәселе көтерді.
«ОЛҚЫЛЫҚПЕН ЖҰМЫСТЫ МИНИСТРЛІК ӨЗІНЕН БАСТАСЫН!» деп басталған жазбада ұстаз мектептерде талап етілетін «Үлгерімі төмен оқушымен жұмыс» жоспарының қажеттілігі мен құқықтық негізіне күмән келтірген.
Автордың айтуынша, мұғалімдердің онсыз да көп құжатына тағы бір жұмыс жоспары қосылған.
«Мұғалімнің папкасына тағы бір құжат қосылыпты. Атауы — «Үлгерімі төмен оқушымен жұмыс».
Сұрақ бар:
Қай оқушымен жұмыс істейміз?» – деп жазған педагог.
«Үлгерім 100 пайыз болса, үлгерімі төмен оқушы қайдан шығады?»
Сәния Нүсіпәлі өз жазбасында оқушылардың тоқсандық бағалары мен білімдегі олқылықты анықтау мәселесіне назар аударған.
Оның айтуынша, барлық пәннен үлгерім көрсеткіші 100 пайыз болған жағдайда «үлгерімі төмен оқушы» ұғымын нақтылау қажет.
«Барлық пәннен үлгерім көрсеткіші — 100%. Тоқсан қорытындысында «2» алған оқушы жоқ. «3» алатын оқушы орташа деңгейде оқиды.
Ендеше, үлгерімі төмен оқушыны қандай өлшеммен анықтаймыз? Қай нормативтік құжатқа сүйенеміз? Қандай критерий негізінде жұмыс жоспарын жасаймыз?» – деп сұрайды ол.
Педагогтің бұл сауалы оқушылардың білім сапасын бағалауда қолданылатын ұғымдарға қатысты.
Оқушының тоқсандық қорытындысында қанағаттанарлықсыз баға болмауы оның барлық оқу мақсатын толық меңгергенін білдіре бермейді. Дегенмен нақты олқылықты анықтау мен белгілі бір санаттағы оқушыларға арнап міндетті жұмыс жоспарын рәсімдеу — екі бөлек мәселе.
Жазба авторы да осы талаптың қандай өлшемдерге негізделгенін түсіндіруді сұрап отыр.
«Алдымен құжат дайындаймыз, сосын сол құжаттың бар-жоғын тексереміз»
Мұғалімнің айтуынша, білім саласында құжат дайындау мен оны тексеру жұмыстары көбейген.
Ол мәселені шешудің орнына есеп пен жоспар әзірлеуге басымдық берілетінін сынға алған.
«Білім саласында бір қызық заңдылық қалыптасты: мәселені шешуден бұрын соған арнап құжат дайындаймыз. Құжаттың дұрыстығын тексермей тұрып, мұғалімге орындатамыз. Сосын сол құжаттың бар-жоғын тексеретін тағы бір жұмыс пайда болады», – деп жазған ол.
Автор оқушының біліміндегі олқылықты анықтап, оны жоюға бағытталған жұмысқа қарсы емес екенін атап өткен.
Оның қарсылығы — нақты қажеттілігі мен өлшемі түсіндірілмеген құжаттарды міндетті түрде толтыруға қатысты.
«Мұғалім оқушының біліміндегі олқылықты анықтап, онымен жұмыс істеуге қарсы емес. Қарсы болатыны — нақты өлшемі түсіндірілмеген, қажеттілігі дәлелденбеген, тек папканы толтыруға арналған қағазбастылық», – дейді педагог.
Министрлікке қойылған төрт сұрақ
Сәния Нүсіпәлі Оқу-ағарту министрлігінен бірқатар мәселені нақты түсіндіруді талап еткен.
Ол ең алдымен «үлгерімі төмен оқушы» ұғымының ресми анықтамасын білгісі келеді.
Сондай-ақ мұндай оқушыны анықтаудың нақты критерийлері қандай екенін сұрайды.
«Министрлік алдымен мынаны түсіндірсін:
-
«Үлгерімі төмен оқушы» деген кім?
-
Оны анықтаудың ресми критерийлері қандай?
-
«Үлгерімі төмен оқушымен жұмыс» құжатын міндеттейтін нақты нормативтік акт қайсы?
-
Егер мұндай оқушы жоқ болса, мұғалім кіммен және қандай негізде жұмыс жоспарын жасайды?» – деп жазған автор.
Бұл сұрақтар бір ғана құжаттың атауына емес, оны толтыруға міндеттейтін талаптың негізіне бағытталған.
Егер мектепте нақты үлгерімі төмен оқушы анықталмаса, мұғалімнің қандай жоспар әзірлеуге тиіс екені де түсініксіз болып қалатынын алға тартады.
«Құжаттағы олқылықты мұғалім толтырмауы керек!»
Педагог жазбасын министрлікке бағытталған өткір үндеумен аяқтаған.
«Білімдегі олқылықты анықтау керек. Бірақ олқылықты мұғалімнің папкасынан іздеу — мәселені шешу емес.
Құжаттағы олқылықты мұғалім толтырмауы керек. Нормативтік талаптағы олқылықты министрлік түзетуі керек!» – деп түйіндеген Сәния Нүсіпәлі.
Автордың көтерген мәселесі — білімдегі олқылықтарды жою жұмысының өзіне қарсылық емес, осы мақсатпен мұғалімдерге жүктелетін қосымша құжаттардың негізділігі.
Сәния Нүсіпәлі осы жайттарға Оқу-ағарту министрлігінен жауап күтетінін білдірген.
