2025 жылдан бастап өмірге ерекше балалар келеді

08 қаңтар 2025

1034

2025 жылдан бастап өмірге ерекше балалар келеді

Бүгіннен бастап дүниеге Бета-ұрпақ келеді. Олар өздерінің алдындағы Альфа буынды алмастырады. 2025 жылдан бастап дүниеге келетін Бета-балалар (Generation Beta) цифрлы қоғамда жасанды интеллектімен біте қайнасып өседі. Олардың көпшілігі ХХІІ ғасырға аяқ басып, ол заманның да куәгері болады. Бета-балалар толығымен цифрлы әлемде өмір сүреді, ақылды құрылғылар олардың тұрмыс-тіршілігінің бөлінбес бөлшегі болады. Қазір біз кейбір балаларды үй тіршілігіне икемсіз, жалқау дейміз ғой, бұл бекер емес, олар «іштен оқып туған», тұрмыстағы шаруаның бәрін ақылды құрылғыларға арта салатынын біледі. Бета-балаларға бір жағынан жеңіл болғанмен, олар экологиялық ахуал ушыққан, жаһандық жағдай шиеленіскен кезде өмірге келгелі тұр. Планетаның, адамзаттың тағдырын шешетін де осы Бета-буын болғалы тұр дейді демограф-футурологтар. Әрбір 20 жыл сайын адамзат ұрпағы тарихи-мәдени жағдаятқа, технологияның дамуына қарай жаңарып, ауысып отырады. Олардың өмірге көзқарасы мен құндылықтары да соған сәйкес қалыптасады. 2025- 2039 жылға дейінгі буын Бета-ұрпақ болып есептеледі. Альфа буын – 2010 жылдан 2024 жылға дейін туғандар. Z буын 1996-2010 жылдар аралығында өмірге қадам басты. Ал миллиениалдар – 1981-1996 жыл аралығында туды. 1965-1980 жылдары туған біздің буын Х-ұрпаққа жатады (Generation X). Бэби-бумерлер — 1946–1964 туған аға буын. Үнсіз ұрпақ – 1928–1945 жылғылар. Ұлы ұрпақ – 1901–1927 жылы туған аталарымыз бен апаларымыз. Жаңа жыл түнінде еліміздегі перзентханаларда 181 сәби дүниеге келіпті, оның 105-і ұл және 76-сы қыз. Хош келдің, Бета-бөпелер! Дина ИМАНБАЙ, қоғам белсендісі. Facebook жазбасы. Фото көрнекілік үшін.