15 қыркүйектен бастап Қазақстанда заңды тұлғалардың қолма-қол емес шетел валютасын сатып алу тәртібіне өзгерістер енгізіледі. Жаңа талаптар стейблкоиндармен байланысты операцияларды да қамтиды, деп жазады Democrat.kz.
Ұлттық банктің 27 тамыздағы қаулысымен валюталық операцияларды жүргізу ережелері өзгертілді.
Жаңалықтардың бір бөлігі Ұлттық банктің арнайы реттеу режимінде жұмыс істейтін және ақшамен қамтамасыз етілген цифрлық қаржы активтерін — стейблкоиндарды шығаратын компанияларға қатысты.
Мұндай компаниялар экспорт немесе импорт келісімдері бойынша стейблкоиндарды өтеу үшін шетелдік қаржы ұйымдарының шоттарына валюта аудара алады.
Белгіленген шектен жоғары көлемде валюта сатып алатын заңды тұлғалар банкке валюталық келісімшарт және операция мақсатын растайтын құжаттарды ұсынуға тиіс.
Егер сатып алынған валюта он жұмыс күні ішінде көрсетілген мақсатқа жұмсалмаса, оны кейінгі үш жұмыс күні ішінде қайтадан теңгеге сату талабы сақталады.
Банктер сатып алынатын валютаның көлемін келісімшарттағы сомамен салыстырып тексеруге міндетті болады.
Жаңа талаптар 15 қыркүйектен бастап күшіне енеді.
