Орынборда жағдай қиындап барады

Орск қаласында су бөгеті бұзылып, 6 мың 600-ден астам үйді су басты.  Орскіде қаласының ескі бөлігіндегі көшелердің бәрін су басқан. Тасыған су үйлердің төбесіне дейін жеткен. Адамдар қайықпен қатынап жүр деп хабарлайды Democrat.kz. Ақпараттық порталы 24.kz.-ке сілтеме жасап.

Тұрғындар тасқынынан қатты зардап шегіп жатыр. Әсіресе Орынбор облысындағы ахуал күрделі. Жалпы Орынбор облысындағы Жайық суы он бір метрге дейін көтерілген. Мамандар бұл 2014 жылы салынған жаңа бөгеттің жобалық деңгейінен екі есе көп дейді.

Орынбор облысының губернаторы да мұны өңір тарихындағы ең ірі су тасқыны деп айтты. Жергілікті билік Башқұртстан мен Челябі облысынан Ирикла өзенінің тасуы біраз басылғанымен әлі де қатты деп отыр. Қазір Ириклинск қоймасынан ағызалатын су мөлшері бес жүз текше метрге азайтылды.

Дегенмен, мамандар жақын арада нөсер жауы мүмкін деп болжайды. Орынбор облысында Ресейдің өзге өңірлерінен келген жеті жүз құтқарушы жұмыс істеп жатыр.

Ахуалға қатысты Төтенше жағдайлар министрлігі өкілін тыңдайық. Александр Ситников, РФ Төтенше жағдайлар министрлігінің өкілі: “Орск қаласының ескі бөлігінде су әлі тасып жатыр. Апат аудандарынан тұрғындарды эвакуациялауды Төтенше жағдайлар министрлігі мен басқа да құрамалар жүзеге асыруда.

Адамдарды қауіпсіз жерлерге қайықтармен көшіру үшін Пермь облысынан арнайы аэромобиль тобы көмекке келді. Қазір су басқан аймақтан төрт жарым мыңнан астам тұрғын эвакуацияланды”,- дейді.

Жергілікті билік 33 орналастыру пунктін ашамыз деп мәлімдеді. Олар 23 мың адамды қабылдай алады.Орынбор облысынан басқа Ресейдің тағы 35 аймағы су тасқынынан зардап шегіп отыр.

Алтай өлкесінде де төтенше жағдай енгізілді. Бұл аймақта бес жүзден астам үй су астында қалды. Самара облысындағы тоғыз ауданды су басты. Бес жүзге жуық адам эвакуацияланды.

Су тасқыны салдарынан Мари Эл өлкесінде бөгет бұзылды. Мәскеу облысының да бірнеше аймағын су басып жатыр. Ал Омбы мен Новосибирск облыстарында жоғары әзірлік режимі жарияланды.

Фото ашық дереккөзден алынды.